Resaca das Xornadas

Bos días, amigos labouristas... se é que a estas alturas sodes quen de estar espertos despois da peazo fin de semana que nos marcamos...

Para os que non puidestes vir, só dicirvos que (non é por darvos envexa, senón que así foi) os días de actividades desta edición das Xornadas foron especialmente divertidos e exitosos. Por primeira vez coincidiron no mesmo sitio todos os integrantes do Lab·Ou, e coa axuda doutros amigos e colaboradores que pasaban por Ourense (por citar algúns, Emma Ríos, Alberto Vázquez, Bernal Prieto, Brais Rodríguez, Manel Fontdevila e Albert Monteys) realizaron un par de interesantísimos exercicios de estilo colectivos que pouco a pouco iremos amosando por aquí (dadenos un par de días de marxe, aínda nos estamos recuperando...).

Ademais, xantamos e ceamos, botamos moitas risas, saímos ata as tantas, xogamos ao futbolín, e ata descubrimos algúns segredos dalgúns autores galegos (isto non é Salsa Rosa e non imos cotillear, poderiamos falar dos excesos nocturnos dalgún coruñés e da curiosa pulsión homoerótica nunca resolvida entre algúns camaradas debuxantes, pero non imos facelo... :-) ).

Se algún dos nosos colaboradores se anima a enviarnos fotos que ilustren a súa estancia nas Xornadas poderemos amosarvos como foi este invento e o ben que o pasamos. Moitas grazas a todo o mundo (David, Miguel, Cosme, os Covelos, Roque, Toni e aos xa mencionados) pola vosa colaboración e boa onda nesta edición. Esperemos que a do ano que vén sexa aínda mellor... e que nos volvamos xuntar moito antes para facer outro exercicio colectivo tolo destes en calquera momento e lugar... ¿Vigo, Santiago...? ¿Outono, inverno, primavera...? Xa o falaremos.

Vita brevis, BD longa!